Sigrun og Oddgeir i Sverige!

Með Hörð og Herdísi í heimsókn.

2007-04-05T01:58:00.000-07:00

Hæ hæ,
Við Oddgeir erum nú loksins aftur búin að fá heimsókn. Hörður og Herdís komu til okkar þann 29. mars. Þau leigðu sér að sjálfsögðu hjól strax fysta dag, og við erum búin að þræla þeim út síðan. Já, við mælum sterklega með því að þeir sem komi í heimsókn til okkar æfi sig bæði í því að ganga og að hjóla, því að við eigum ekki bíl! ;) Það var rosalega gott veður þegar þau komu, og næstu tvo daga, þannig að við nýttum þá daga til þess að rölta um í miðbænum á Lundi og njóta veðursins. Við sýndum þeim Botaniska trådgården og fleiri áhugaverða staði í miðbænum, og keyptum okkur að sjálfsögðu ís, þar sem ísbúðin er loksins búin að opna aftur eftir veturinn (hún er sko bara opin á sumrin). Þau voru steinhissa á því hvað Svíar eru skemmtilegir. Þar sem það var svo gott veður einn laugardaginn, var verið að selja gasblöðrur og fleira svoleiðis í bænum, lúðrasveitin var mætt á staðinn og það var rosalega margt fólk niður í bæ að njóta veðurblíðunnar.
En svo átti Oddgeir að sjálfsögðu afmæli þann 1. apríl. Þá fékk hann pakka. Hann fékk rosalega flott úr frá mér. Svo fékk hann 2 aukapakka við spilið Settlers frá Catan, frá Kati og Mike. Það spil er búið að vera í uppáhaldi hjá okkur og við, þ.e. Ég, Oddgeir og Kati, erum búin að spila það rosalega mikið. Að sjálfsögðu þegar Hörður og Herdís mættu á svæðið voru þau látin spila það líka með okkur, og að sjálfsögðu einnig með öðrum aukapakkanum. En við erum öll, nema Oddgeir, orðin ansi þreytt á því hvað Oddgeir vinnur spilið oft. Það liggur við að einginn annar eigi séns! ;)
Þann 2. apríl fórum við svo til Gautaborgar og skoðuðum þann bæinn. Þetta var nú meiri stórborg en maður er vanur hér. Okkur Oddgeir líkar betur við smábæarbraginn í Lundi en stórborgarfílinginn í Gautaborg og í Stokkhólmi. Við gengum svo mikið þann daginn, 2. apríl, að við gengum næstum því af Herði og Herdísi dauðum! :) Þessvegna ákváðum við bara að slappa af daginn eftir. Ég þurfti reyndar að skreppa í skólann í smástund. En svo spiluðum við bara og slöppuðum af.
Í gær skruppum við svo í Burlöv center, sem er verslunarmiðstöð í Arlöv/Burlöv, sem liggur á milli Lund og Malmö. Í dag ætlum við svo að kíkja í eina enn verlsunarmiðstöð í Lödderkopinge sem heitir Center Syd. Þar er íþrótta outlet og risa Ica Maxi, einskonar Hagkaupskeðja, ásamt helling af venjulegum og skemmtilegum búðum, eins og t.d. H og M. Með þessum degi munum við klára verslunarleiðangra Harðar og Herdísar, þar sem við verðum að skilja eftir nóg pláss í töskunum þeirra til þess að taka með allt dótið sem við ætluðum að senda þau heim með. ;)
En ég segi þá bara bæ í bili, og heyrumst síðar....
Sigrún

Jibbí - nýr póstur!!!

2007-03-23T11:08:00.000-07:00

Ég er komin með samviskubit að hafa ekkert bloggað, þannig að hér kemur einn póstur. Við Oddgeir erum svo til nýkomin heim frá Póllandi. Við skelltum okkur til Gdansk þann 11. mars og komum til baka til Köben þann 20. mars. Við gistum á voðalega kósí litlu hóteli sem heitir Villa Isabel. Þetta var greinilega fjölskyldu-business. Það eru 7 herbergi á hótelinu og það virtist vera aðallega fjölskyldan sem afgreiddi okkur. Þetta var eins og lítill kastali og allt í voða antikstíl. Hótelið var rétt við gamla bæinn, þannig að við skoðuðum hann nokkuð vel. Helling af eld-gömlum og rosa flottum húsum, og geðveikt margar kirkjur. Það var geðveikt ódýrt að borða á veitingastað þarna. Við fórum m.a. á einn Gdanska, túrista-veitingastað, sem er frekar flottur en troðinn af dóti. Það gefur sko því að vera troðið af dóti nýja merkingu. Það var víst einhver ríkur kall sem keypti eiginlega alla verðmæta antíkmuni á svæðinu og opnaði þennan veitingastað með þeim öllum troðnum saman í. Þar borguðum við reyndar alveg 100 pólskar, sem er alveg 2.300 kall, óvenjulega mikið ha???
En svo skoðuðum við líka nokkrar af verslunarmiðstöðunum þeirra. Það er rosalegur uppgangur í landinu, þannig að hvað byggja þeir - auðvitað verslunarmiðstöðvar! Við versluðum nú samt ekki mikið, en smá. Verðlagið á þessum merkjafötum var alveg svipað og hér í Svíþjóð. Sem er nú náttúrulega minna en á Íslandi. he he he... En við fórum í eina al-pólska "verslunarmiðstöð". Þetta leit út eins og ein af þessum iðnaðargötum í niðurnýslu. Það voru nokkur hús í götunni, öll 2 hæða, að mig minnir, og hrá að innan. Þegar við gengum inn í húsin var það einskonar Kolaports-fílingur. Nema í hverju herbergi í húsunum var einn söluaðili með allskyns föt, töskur eða snyrtivörur - og sko oftast eitt eða tvennt af hverju. En reyndar voru þetta ekki notuð föt, greinilega bara samansafn af gömlum lagerum. Okkur var sagt að þarna versli margir Pólverjar á sig fatnað. En við fundum ekki neitt, eins og við var að búast. Við gáfumst reyndar upp eftir 2 hús ;)
En við fundum geðveikt flotta útivistarbúð, þar sem við gátum keypt þunna göngusokka á 300 kall íslenskar, mjög gott verð. Þannig að við keyptum að sjálfsögðu svoleiðis, og Oddgeir varð náttúrulega líka að kaupa sér veiðihjól og veiðihatt, he he he... En í staðinn fékk ég að kaupa mér nýja spariskó í annari búð að sjálfsögðu.
En nóg um búðarráp. Við skoðuðum að sjálfsögðu líka Gdyniu og Sopot. En þær tvær ásamt Gdansk mynda tri-city. Sopot er túristaparadísin, með hvítri strönd, skemmtilegri göngugötu og þar er hægt að finna sér Spa og flott hótel. En það var ekki nægilega gott veður fyrir strandarferð hjá okkur. En við gengum nú samt eftir löngu bryggjunni þeirra, og göngugötunni og fengum okkur köku á einu kaffihúsinu.
Ég verð að hryggja ykkur með því að við fórum ekki að skoða neitt safn. En við fórum samt sem áður að skoða freedom sýninguna þeirra, sem er utanhúss í Gdansk. Þar sem við sáum gamlar myndir, skúlptúra og part úr Berlínarmúrnum, ásamt mynd af þeim sem stóðu í röð við hann til þess að verða skotnir. Ekki mjög fallegt það.
En allt í allt var þetta mjög skemmtileg ferð hjá okkur.
Svo er gaman að segja ykkur frá því að þann 29. mars, þ.e. á næsta fimmtudag koma Hörður og Herdís í heimsókn til okkar. Alltaf gaman að fá skemmtilegt fólk í heimsókn!
En ég kveð þar til næst - og við skulum vona að það verði ekki langt þangað til það verður!

Gleðilegan öskudag!

2007-02-21T02:21:00.000-08:00

Hvað ætlið þið að vera? Það var spurninginn sem hjómaði á vörum allra í gamla daga, a.m.k. þegar ég var lítil, fyrir öskudaginn. Hvað ætlar þú að vera á Öskudaginn? Ætlar þú að vera prinsessa, sjóræningi, Batman eða kannski Súperman eða auðvitað smá-barn?
Ég er að hugsa um að fara niður í bæ á eftir og kaupa mér eitthvað sniðugt í dótabúðinni þannig að ég geti farið sem prinsessa, engill, sjóræningi eða eitthvað þessháttar í kvöldmat á nationinu okkar í kvöld. Maður verður nú að halda Öskudaginn í heiðri.

Sudoku þraut!

2007-02-10T11:12:00.000-08:00

Jæja eins og ég lofaði þá er hérna komin þessi blessaða Suduko þraut, sem eitthvað vafðist fyrir mér, einsog ég sagði þarna til að byrja með þá getur verið að ég hafi bara ekki verið með hugan við efnið, en hvað um það, þetta er sú Suduko þraut sem mér finnst hingað til hafa verið erfiðust. Endilega prentið hana út og glímið við hana.

En ég bið ykkur um að pósta ekki svarinu á þessa síðu því það myndi hugsanlega eyðileggja fyrir öðrum sem vilja glíma við þrautina. En ykkur er að sjálfsögðu leyfilegt að láta vita hvernig ykkur fannst hún.

		1	5		6	4
							6
4				7				2
	2				1			8
	7						4
8			9				2
5				3				4
	8
		9	6		7	3

Einnig ætla ég að benda ykkur á að í Sudoku þarf ALDREI að giska á rétta tölu, það er ALLTAF hægt að sjá út hvaða tala á að vera á hvaða stað. Þannig að ekki eyðileggja skemmtun ykkar með röngum aðferðum.

Góða skemmtun!

Ferðalag dagsins í dag....

2007-02-06T13:44:00.000-08:00

Ég var reið í gær. Reið út í sænska kerfið. Reið yfir því að svíar geta aldrei haft neitt einfalt. Reið yfir því að ég get ekki fengið tölvukort í lögfræðideildinni í Lundi af því að ég er í ,,frístandandi kúrsum" og því ekki skráð í deildinna; og síðast en ekki síst reið yfir því að ég get ekki prentað neitt út þess vegna! Þannig að ég ákvað að kaupa prentara.
Þannig að ég fann prentara á góðu prísi eða einungis 3.000 íslenskar krónur í Elgiganten, sem er eiginlega Elko. Svo lagði ég af stað, og dró Oddgeir náttúrulega með mér, í ferðalag til þess að kaupa þennan prentara. En þegar við komum á staðinn þar sem búðin átti að vera fundum við hana ekki. Þetta var að sjálfsögðu vegna þess að ég er frekar áttavillt manneskja og á því erfitt með að lesa út úr kortum og yfirfæra þau á göturnar sem ég sé (en að sjálfsögðu tók ég ekki kortið með mér). Þannig að við hjóluðum í einn og hálfan klukkutíma. Fundum reyndar búðina, en auðvitað var prentarinn uppseldur.
Þannig að við fórum heim. En þar sem ég var líka orðin leið á því að eiga ekkert sjónvarp hafði ég haft samband við mann sem var að selja gamla sjónvarpið sitt á netinu. Þetta er risastórt 28 tommu gripur, í lit og allt, og á þessu góða prísi eða einungis 2.000 íslenskar krónur. Þannig að að sjálfsögðu dró ég Oddgeir út og við héldum af stað í strætó í næsta bæjarfélag í 30 mín. Þar keyptum við svo sjónvarpið og fórum svo tilbaka í strætó í 30 mín. Auðvitað þurfti Oddgeir að bera það næstum alla leiðina einn. En hann kvartaði ekkert.
Þannig að við eigum núna þetta gæða sjónvarp, 28 tommu, stærra en gæða sjónvarpið sem við áttum heima (reyndar suða þau bæði, en það er annað mál), og með fjarstýringu, sem er nú meira en fylgdi sjónvarpinu okkar heima!
Nú erum við á grænni grein! Búin að þvælast í næsta bæjarfélag með strætó og kaupa sjónvarp (sem var by the way mjög þungt). Sannir Íslendingar!

2007-01-30T13:38:00.000-08:00

Vegna þess að það vantaði eiginlega mynd fáið þið hérna að sjá skemmtilega mynd af Oddgeiri á gamlárskvöld í Þorlákshöfn.

Tómt tjón!

2007-01-30T13:21:00.000-08:00

Við Oddgeir vorum í mestu makindum að horfa á Boston Legal í dag þegar talvan, flotta talvan, hrundi! Þannig að núna verðum við að horfa á video í minni tölvu með leiðindaskjánum.
Ég er ekki búin að vera í skólanum í gær eða í dag. Kennarinn minn skrapp til Víetnam í viku þannig að það er engin kennsla á meðan. En massív þegar hann kemur til baka. Þannig að það er eins gott að lesa vel á meðan.
Við Oddgeir erum ekkert búin að gera neitt svo merkilegt. Við fórum í venjulega sunnudags-brunch-inn hjá einu nationinu (stúdentafélagi) á sunnudaginn og svo í venjubundna sunnudagsbíóið um kvöldið, sem er í öðru nationi. Við vorum eiginlega ekki búin að fara neitt eftir að við komum til baka hingað, leti og svona :) Sunnudagsbíóið var Superman returns. Ég var búin að gleyma því hvað hún var löng og langdregin. Oddgeir var alveg að sofna. he he he. En reyndar var þetta mjög flott mynd, en það hefði mátt gerast aðeins meira á öllum þessum tíma.
Svo fórum við á laugardagskvöldið á annað nation, sem var með rock-kvöld. Það var nú meira rockið. Bara svona 5 lög sem ég þekkti, eða eitthvað svoleiðis. Þungarokk inn á milli og einhver lög sem ég bara hafði aldrei heyrt áður. Samt sem áður tel ég mig nú alveg hlusta á ýmist rokk. En kannski er ég bara að misskilja.
Á morgun er svo annar dagur heima að lesa. Það er nú ansi erfitt að vera heima og lesa þegar maður hefur helling af skemmtilegum tímaritum, tölvuna og internetið, aðrar og meira freistandi bækur, og videoþætti, og náttúrulega mat, og þvottinn í dag. Það er bara erfitt að halda sér við lesturinn... :)

Alvaran kallar...

2007-01-21T14:57:00.000-08:00

Nú erum við næstum því búin að koma okkur aftur fyrir hér í Lundi eftir jólafríið. Allt er að komast aftur í sínar gömlu föstu skorður, t.d. kíkir Oddgeir á veðurfréttirnar 5 sinnum á dag. Skólinn er að byrja hjá okkur. Ég er búin að fara í kynningartíma í íþróttasálfræðinni og er að fara í kynningartíma í samanburðar-evrópu-réttarsögunni í fyrramálið. Þetta verður allt saman mjög spennandi. Að fá að fara í flotta lögfræðihúsið...
Við fengum gesti með okkur til Lunds í 4 daga, eða 4,5 (eða eitthvað svoleiðis). Haffi, Eva, Gunni og Heiða sváfu á gólfinu hjá okkur á vindsængum. Við kíktum með þeim til Helsingborg á innibandýleik - hvað annað - og að sjálfsögðu kíktum við aðeins á þá borg í leiðinni. Daginn sem þau komu fórum við á Carlsberg safnið í Köben. Það var nú lítið merkilegt. Það eina sem var merkilegt var að við fengum að smakka 2 tegundir af bjór. Gott fyrir þá sem fíla bjór. En svo fórum við út að borða á Reef n Beef, sem er ástralskur veitingastaður, einnig í Köben, sem selur m.a. krókódílakjöt og kengúrukjöt. Við stelpurnar fengum okkur allar The hunted hunter, sem þið getið giskað á hvað var. Oddgeir gæddi sér á kengúru sem var svo skolað niður með rauðvíni sem bragðaðist næstum því eins og hvítvín. Þetta var í annað skiptið okkar Oddgeirs sem við förum á þennan veitingastað. Oddgeir hafði áður fengið sér krókódíl, sem var það sem ég fékk mér núna, ef þið höfðuð ekki áttað ykkur á því, og þá fékk ég mér emufugl, sem er einhver skrítinn stór fugl sem kann ekki að fljúga. Alltaf gaman að prófa eitthvað nýtt, svo framarlega sem það er innan skynsamlegra marka. Ég hleypi ekki sniglum inn fyrir mínar varir. Þeir eru bara svo slímugir og ógeðslegir. Ég held að það séu ekki til ógeðslegri dýr á jarðríkinu. En ég ætla að leyfa ykkur að dæma um það fyrir ykkur sjálf.

Ogga blogg

2006-12-17T15:57:00.000-08:00

Já ég veit að ég er orðinn spenntur að koma heima til Íslands! Og líka að að labba útúr prófinu á morgun.. það er sko alveg pottþétt að ég mun fá mér öllara eftir þessa önn! Alveg ótrúlegt hvað höfuðið á mér hefur lært mikla tölfræði undanfarna daga.. bara að vona að þetta sé næg tölfræði sem ég hef lært! En það kemur í ljós í fyrramálið ;) Á bara eftir að lesa í svona 1-2 tíma í viðbót og svo get ég fengið mér 4-5 tíma svefn fyrir prófið! Mætti halda að maður sé að verða stressaður fyrir próf svona í lokinn á skólaprófaferli manns, en treystið því að svo er ekki! Ekki til stress í Ogga! Ég er svo afslappaður að ég er ekki einusinni byrjaður að pakka fyrir heimferðina!

En að öðru, um daginn þegar ég var í friðlýsta herberginu og var að dunda mér við að gera Suduko þraut lenti ég í mjög svo óvenjulegri þraut! Þrautin var bara virkilega erfið og þurfti ég nokkrar heimsóknir í friðlýsta herbergið áður en þrautin var leyst. Kannski hef ég bara ekki verið rétt motiveraður fyrir þessa tilteknu þraut, en ég ætla setja hana hérna inná bloggið þannig að þið getið dundað ykkur við hana. Stefni á að koma henni hingað inn fljótlega eftir að ég kem til Íslands.

Að lokum vill ég óska mér góðs gengis í prófinu í fyrramálið og góðrar flugferðar heim!

Takk fyrir lesninguna,
Oggi

Síðasti póstur fyrir jóla-heimferð!

2006-12-17T12:34:00.000-08:00

Hæ hæ og hó hó.
Við komum heim til Íslands á morgun, eða annað kvöld. Ég veit að ykkur hlakkar til :)
En í gær rakst ég á flottasta kjól sem ég hef séð í H&M. Við Kati, vinkona mín, vorum staddar þar og við stóðumst ekki freistinguna að prófa að máta hann og taka myndir af okkur. He he he.... Hér er fallegi kjóllinn:

Ég held að ég hafi aldrei séð eins flottan kjól... hmmm... eða ljótan!!! he he he

En það tók ansi margar tilraunir að taka þessa mynd með timer í búningklefanum í H&M! og sérstaklega að takast að taka mynd þar sem maður var ekki að deyja úr hlátri.

Lasin

2006-12-13T09:34:00.000-08:00

Hæ hæ. Þannig vildi svo til að ég þurfti endilega að verða lasin, með einhverja leiðinda gubbupest í dag. Ekki er það nú gaman. Akkúrat þegar ég er á fullu í hópverkefni. En þá er það allavega einn enn dagur áður en við komum heim til Íslands yfir jólin, þar sem Sigrún lærir ekkert og tekur ekkert til og kaupir ekki restina af jólagjöfunum. Já, það fer allt að fara til.... Eins gott að ég verði komin í lag á morgun! Langaði bara að deila þessu með ykkur. Ég hafði eiginlega ekki frá neinu meira merkilegu að segja. Ég held að það sé nú ekki rétt hjá Oddgeiri að það gerist meira hjá mér, ég bulla bara meira. he he he....

Hent út úr herberginu!

2006-12-12T12:33:00.000-08:00

Þessa stundina er ég í herberginu mínu. Sem er reyndar eiginlega herbergið hans Oddgeirs núna. Hann tók af mér herbergið mitt ;) Mér var nefninlega hent út úr hinu herberginu! Til þess að Oddgeir gæti talað í símann við mömmu mína. Mig grunar að mamma eigi í vandræðum með að finna jólagjöf handa mér. Sem er eiginlega fyndið af því að það er svo margt sem mig langar í, og svo geðveikt margt sem ég myndi vera ánægð með. En Oddgeir er annað mál. Ekki það að hann myndi ekki vera ánægður með margt. Heldur er svo rosalega erfitt að finna eitthvað handa honum. En ég held að ég sé komin með hugmynd. Nóg um það núna.
Í dag fór ég í Nova Lund. Kringlan okkar hér í Lundi. Ég gerði ekki mjög mikið þar. Keypti bara eiginlega ekki neitt. Bara vítamín. Ég nennti bara ekki að læra. Það er einhvernvegin svo oft margt annað skemmilegra en að læra. Jafnvel þó svo að það þýði að maður hjóli í klukkutíma til þess að snúast í hringi í verslunarmiðstöð virðist það einhvernvegin hljóma betur heldur en að læra.
En ég komst að einu í dag. Danir eru nostalgískir. Margt af því danska sælgæti sem til er í búðunum hérna heitir gammel.. eitthvað eða gammaldags.. eitthvað. Mjög merkilegt ég sá gammeldansk, gammaldags brjóstsykur og gammaldags lakkrís. Þetta er mjög merkilegt. Ætli dönum finnist nútímalegt sælgæti ekki gott???

2006-12-11T15:36:00.000-08:00

Hæ,
langt síðan ég skrifaði eitthvað hér.. ástæðan er líklega sú að allt það skemmtilega gerist fyrir Siggu...
En annars ætlaði ég að segja frá því að ég er búinn að vera einstaklega duglegur undanfarna tvo til þrjá mánuði. Flest haldiði sennilega að ég eigi við skólan.. en nei ekki er það skólinn, held jafnvel að það sé farið að örla aftur á skólaleiða hjá mér.. hugsa ég taki mér frí frá skóla þegar ég hef klárað þrjár annir í viðbót. Líklega er þá löngu kominn tími til að gera eitthvað annað.

Málið er að ég hef verið nokkuð duglegur undanfarna mánuði við að fara í ræktina, og hef ég nú náð þeim árangri að munur á mestu þyngd og minnstu þyngd frá því að ég kom hingað út er 10 kíló! Reyndar má kannski ítreka að þarna er miðað við mesu og minnstu þyngd! En þrátt fyrir það þá er ég mjög stoltur af þessu, enda búið að kosta mig svita og blóð, reyndar óheyrilega mikinn svita, líklega farið að teljast í mörgum tugum lítra. Svo lenti ég í því eittskiptið að ég skar mig pínulítið á vinstri vísifingur.. það blæddi.. smá..

En að tölfræðinnni, enda er ég nú hérna í Svíþjóð til að læra tölfræði..
Vikulega hjóla ég líklega um 200 kílómetra, þ.e. ef ég væri að hjóla utandyra. Og alla þessa kílómetra er ég að hjóla þannig að mótspyrnan á æfingahjólinu er lík því að vera hjóla upp brekku.
Daglega lyfti ég að lágmarki þunga sem nemur um 4.2 tonnum og geri ég það yfirleitt á 20-30 mínótna tímabili. Það gerir að lágmarki um 30 tonn á viku.
Ef við miðum við að árangurinn sé línulega háður tíma og að ég muni vera jafnduglegur næstu 30 mánuðina þá mun ég vera 0 kíló. Sem myndi náttúrulega þíða það að eftir þann tíma, þ.e. þegar ég orðinn mínus kíló, þá gæti ég farið að rukka flugfélögin fyrir að sitja í hjá þeim!

Ég á því miður ekki myndir til að sýna árangur, enda eru fyrir og eftir myndir sem maður sér í blöðunum alltaf dálítið feik. En ég ætla láta aðra mynd í staðinn. Myndin lýsir mér ágætlega þegar ég sit í fyrirlestrum sem eru á sænsku, oft á tíðum mjög leiðinlegum og illskiljanlegum.

Nóg af rugli í bili, tími til kominn að hugsa..
Kveðja,

Oggi

Á bakvið tjöldin

2006-12-11T02:42:00.000-08:00

Mér datt í hug að ykkur hefði kannski tekist að sjá veigarnar á bakvið Oddgeir á síðustu mynd. Sérstaklega þar sem Oddgeir benti ykkur á það. Ég ákvað að taka næsta skrefið og sýna ykkur bara nærmynd! En ég læt þær upplýsingar fylgja með að þessar veigar voru keyptar í Danmörku þar sem veigar af þessu kyni eru mun ódýrari þar en hér í Svíþjóð.

Annars verð ég að viðurkenna að mér finnst þessi drykkur ekki mjög góður, og alls ekki svalandi. En það finnst Oddgeiri.

Vill einhver giska á hvað það eru margar dósir í þessum stafla?

Svitinn drýpur af Oddgeiri!

2006-12-05T05:03:00.000-08:00

Þetta fína hjól sem þið sjáið hér á myndinni er hjólið hans Oddgeirs. Það er svona í minnsta lagi fyrir hann. Aðallega vegna þess að við gátum ekki hækkað hnakkinn. Þannig að Oddgeir ákvað loksins að kaupa sér nýja stöng eða sadelstolpa, sem myndi geta útlistast sem söðulstólpi. Eftir að hafa keypt sér þann grip ákváðum við, í gær, að setja þennan nýja flotta ,,stólpa" á hjólið. En það var aðeins erfiðara en við héldum. Þannig var að þessi nýji ,,söðulstólpi" er svona a.m.k. 10 sinnum lengri en sá gamli. Þannig að það var enginn hægðarleikur að koma honum fyrir. Við byrjuðum á því að reyna að koma honum fyrir en allt kom fyrir ekki. Þannig að Oddgeiri datt í hug að nota sleypiefni í formi sápu. En það gekk ekki heldur. Það var ekki fyrr en eftir drjúgan einn og hálfan klukkutíma og hálfan brúsa af olíu sem við loksins komum honum á. Þarna sjáið þið hversu mikil áreynsla það var fyrir aumingja Oddgeir að koma honum á. Ef þið skoðið vel bolinn og hárið getið þið séð hversu sveittur hann varð.

Íslendingar

2006-12-03T05:54:00.000-08:00

Við Oddgeir höfum ekkert verið að leggja mikið upp úr því að hitta eða kynnast Íslendingum hér í Lundi. Eiginlega tókum við þá ákvörðun strax að við vildum frekar kynnast Svíum og venjulegu lífi hér í Svíþjóð heldur en að umgangast Íslendingana mikið. Við vissum af því áður en við komum út að hér væri slatti af Íslendingum, bæði í námi og búandi hér. Reyndar höfum við ekki kynnst mikið af Svíum, þar sem við búum á svæði þar sem engir Svíar búa. Þannig að við höfum mest umgengist fólk hvaðaæva að. Reyndar aðallega Þjóðverjum og Austurríkjamönnum. En það er kannski skiljanlegt þar sem helmingurinn af þeim sem búa hér í þessari húsaþyrpingu eru þýskumælandi.
En Oddgeir er í tímum með tveimur Íslendingum núna. Annar þeirra kom hingað til þess að búa með bróður sínum sem býr með sænskri konu og ætlar að vera allt sitt háskólanám hér í Lundi, hinn Íslendingurinn er ekta Íslendingur. Hann fann annan Íslending sem býr hér og fékk að leigja herbergi hjá honum, henn er aktífur í Íslendingafélagunu og er í Íslendingakórnum. Hann plataði Oddgeir til þess að kaupa miða á desemberfagnað Íslendingafélagsins í Lundi. Þannig að við skelltum okkur.
Þetta var einskonar fullveldishátíð. Reyndar gleymdi Oddgeir að segja mér það. Ég hélt að ég væri að fara á jólaball, eða hlaðborð eða eitthvað þessháttar. Þegar við mættum á svæðið var búið að skreyta og gera allt voða Stuðmannalegt. Þemað var nefninlega Stuðmenn. Þannig að það voru sungin Stuðmannalög og skemmtiatriðin voru tekin beint upp úr fyrri kvikmyndinni. Forrétturinn hét Sísí fríkar út og samanstóð ef rúgbrauði með túpu-kavíar, smá ekta-kavíar klípu, tveimur rækjum og einni súkkulaðihúðaðri kókóskúlu. Mjög spes hugmyndaflug þarna á ferðinni. Aðalrétturinn þurfti að sjálfsögðu að vera íslenskur, og hvað er meira íslenskt og jólalegt en hangikjöt, kartöflur, uppstúfur og grænar baunir? Þannig að við fengum það. Nema það að við fengum sænskt lambakjöt. Ekkert afskaplega gott lambakjöt verð ég að segja. En okkur var sagt að þetta væri gæða lambakjöt miðað við venjulegt lambakjöt á þessum slóðum. Að sjálfsögðu var svo Astralterta í eftirrétt (hvað sem það nú er þar sem ég hef aldrei ennst að horfa á alla myndina), að hætti Stuðmanna.
Að mínu mati var þetta allt soldið nostalgíu-íslenskt. En líklega var það hugmyndin þar sem flestir þarna voru yfir 40 ára, margir yfir 60 ára og líklega búin að búa lengi hérna í Svíþjóð. En þetta var alveg ágætt. Við skemmtum okkur ágætlega. Þegar líða tók á kvöldið byrjaði einn ofur-drukkinn íslenskur læknir vinnandi í Svíþjóð að ræða við okkur. Við áttuðum okkur á því að þarna hefðum við hitt mesta íslenska rasista sem við höfðum augum litið. En það lífgar bara upp á tilveruna að hlusta á ýmisleg sjónarhorn, eða eitthvað svoleiðis...
En heimferðin var ekki eins glæsileg. Við þurftum nefninlega að hjóla í meira en 30 mínútur til þess að komast þangað og þegar við ætluðum að hjóla heim var sprungið á dekkinu hans Oddgeirs. Heimleiðin var löng...

Bíó

2006-11-30T04:47:00.000-08:00

Það er skondið með bíó. Við Íslendingar virðumst vilja gæði þegar kemur að bíóum. Allavega eru okkar bíó frekar flott. Að minnsta kosti er það mitt álit. Allavega í samanburði við það sem ég hef upplifað hér í Svíþjóð. Reyndar fórum við í kúlubíó í Stokkhólmi, en það var á Naturhistoriska safninu og telst varla með. Aftur á móti virðast bíóin hérna í Lundi vera með mörgum litlum sölum og reyndar líka einhverjum stórum. Það sem ég tók fyrst eftir var það að það að fara í sal nr. 2 er ekki trygging fyrir því að þú sért að fara í næstbesta salinn. Besti salurinn getur verið nr. 1 og sá næstbesti nr. 7. Við fórum um daginn í sal nr. 2 í SF-Filmstaden. Hljóðgæðin voru hræðileg, salurinn var mjög lítill, sætin voru ekki þægileg og það voru engir glasahaldarar. Hvað á það að þýða að hafa ekki glasahaldara! Hvert á maður að segtja glösin? ;) Svo er mjög erfitt að fá miða um helgar. Það þýðir ekki að mæta á staðinn, ekki einu sinni klukkutíma fyrr ef maður ætlar að fá miða á mynd. A.m.k. ekki ef maður vill sitja með vinum sínum. Það eru nefninlega númeruð sæti, eins og í leikhúsi. Þannig að maður verður eiginlega að kaupa miðann á netinu fyrr um daginn, eða allavega að taka frá miða. Reyndar er frekar dýrt að fara í bíó hérna. Það virðist flest allt vera aðeins ódýrara hérna en heima á Íslandi, en ekki bíó. Það kostar 85 eða 90 sænskar kr. fyrir fullorðna eftir því hvaða mynd það er, held ég. Sem er þá ca. 850 eða 900 kall. Ef ég skil þetta rétt þá kostar 900 kall þegar mydnin er ný, en svo lækki hún. Ég er samt ekki alveg viss ;)
Og hvað á það að þýða að vera svona kurteis að reyna ekki að selja mér meira á meðan að á myndinni stendur! Þ.e. að hafa ekki hlé. Mjög skrítið. Ef maður kaupir sér nefninlega gos áður en myndin byrjar þarf maður alltaf að pissa þegar myndin er hálfnuð. Þ.e. að því gefnu að maður kaupi sér miðstærð eða stórt gos. Þessvegna þarf maður hlé.
Jæja, en nú er kannski komið nóg um bíó. Allavega finnst mér íslensku bíóin sniðugri. Reyndar verð ég nú að viðurkenna að það er líklega skilvirkara að hafa númeruð sæti. Þá þarf ekki alltaf að hafa 1-3 í vinnu á nýjum myndum til þess að þjappa fólki í sætin og koma fleirum fyrir í salina, eins og heima. He he he...

Crash

2006-11-27T11:02:00.000-08:00

Við Oddgeir horfðum á Crash í dag. Merkileg mynd, og mjög góð. Sýnir á einstaklega skemmtilegan máta að fólk er fífl! he he he...
En annars fengum við okkur líka rosalega gott nautakjöt í gær, og svo líka í dag. Pakkinn var svo stór að við urðum að borða það tvo daga í röð. Oddgeir er alveg búinn að mastera það að steikja nautakjöt medium-rare ;) Við verðum búin að æfa okkur svo vel á nautakjötinu hérna að það verður allt í lagi að kaupa einstaka sinnum dýra nautakjötið á Íslandi! ;)
Þegar mamma kom um daginn kom hún með gamla góða hjólið mitt með sér. Eins og ég hef áður lýst yfir þá finnst mér þetta leiðinda hjólastand hérna með þessi gömlu hjól sem þarfnast stöðugrar viðgerðar hund-leiðinlegt. Þannig að ég fékk til landsins gamla góða fjallahjólið mitt, sem ég fékk í jólagjöf þegar ég var 12 ára. Rosalega skondið að fá það hingað í Lund vegna þess að eiginlega allir hérna eru á svona bæjar-hjólum, með mjóum stöngum og mjóum dekkjum og afar fáum gírum, ef einhverjum. Ég var bara orðin vön þessu gamla bæjar hjóli sem ég var á. En núna er ég á grófu 18 gíra fjallahjóli, ekta Íslendingur.
En það var komin tími til að skipta. Hjólið sem ég keypti hérna er ca. 10 ára gamalt, en þó svo að gamla fjallahjólið mitt sé líka svona gamalt þá er þetta hjól svona a.m.k. 10 sinnum meira notað. Það byrjaði að skrölta fljótlega eftir að ég fékk það, svo hrundi allt gírasístemið af, brotnaði í heilu lagi. Þannig að ég þurfti að reiða hjólið heim. Ljósin eyðilögðust líka mjög fljólega. En ég keypti ný og Oddgeir lagaði gírasístemið. Við keptum nýtt og ég leigði hjól á meðan það var sett á. Oddgeir gerði tilraun til þess að laga bremsurnar, sem hafa aldrei virkað nógu vel, en það gekk ekki vel. Svo núna er hjólið mitt allt í einu hætt að hjóla! Það hjólar í lausu svona 2-30 hringi áður en það grípur í og byrjar að hjóla. he he he... Það hefði ekki mátt seinna vera að segja bless við það hjól og fá annað. Bless herra mustang-hjól!
Ég mæli með því við alla þá sem ætla erlendis að læra að taka með sér hjól. Það virkar eiginlega ekki að kaupa gamalt. Við Oddgeir erum bæði búin að lenda í vandræðum en samt keyptum við bestu notuðu hjólin sem við fundum innan verðmarka (þ.e. ekki næstum ný hjól). Hafið það í huga....
Kveðja, Sigrún.
Og p.s. Þið eruð velkomin að heimsækja okkur ef ykkur langar. Lítill fugl hvíslaði því að mér að Gunni, Haffi og Eva ásamt kannski fleirum væru að hugsa um að mæta á svæðið. Ég mæli með því að þið kíkið!

Mömmudagar

2006-11-21T03:15:00.000-08:00

Þá eru mömmudagarnir liðnir í bili. Þær voru hérna báðar í heimsókn mamma mín og mamma hans Oddgeirs. Við fórum saman í Tívolíið í Köpen. Mömmu minni langaði svo að sjá jólatívolíið. Hún var búin að tala um í mörg ár að henni langaði svo að bjóða mér þangað, þannig að þarna kom tækifærið hennar! Við skruppum á afmælisdaginn hennar, 18. nóv, á síðasta laugardag. Ég held að hún hafi haft voða gaman af því, og við öll!
Það voru rosa jólaljós þarna. Við fórum að kvöldi til til þess að sjá sem mest af ljósunum. Ég held að það hafi nú ekki verið nein mistök. Við Oddgeir notuðum að sjálfsögðu líka tækifærið til þess að skreppa í rússíbanan og fallturninn. Svaka stuð! Það er alltaf jafn hræðilegt að fara í þennan fallturn, en algerlega þess virði ;)
Svo bauð mamma okkur út að borða á steikhús Jensens í Köpen. Reyndar var það áður en við fórum í tívolíið, og eftir að við vorum búin að rölta aðeins á Strikinu. Við fengum rosa góðar steikur. Merkilega góður staður.
En svo að sjálfsögðu urðum við að fara með konurnar að versla. Ég held allavega að þær hafi langað til þess, þannig að við skutumst með þær í Nova lund, sem er aðalverslunarmiðstöðin og eina hér í bænum og náttúrulega í dýrlega miðbæinn okkar í Lund. Ég held að við höfum næstum því gert út af við þær af labbi. En vonandi geta þær eitthvað hvílt sig heima á eftir.
þær keyptu sér smá slatta. Ég er að sjálfsögðu með svo góðan smekk að þegar þær sáu hvað ég á flotta dúka og diskamottur sem ég keypti hér urðu þær líka að kaupa svoleiðis. He he he... Svo keyptu þær báðar sér kápur. En að sjálfsögðu þurfti ég líka að sjá kápu í sömu búð sem var svo geðveikt flott að ég varð að fá hana. Hún er reyndar ekki svona fín kápa, eiginlega meira úlpu-kápa, en geðveikt flott samt sem áður. Já, Inga Þórey hún er meira að segja frá Mexx, he he he...
Þannig að ég stóðst ekki freistinguna og keypti mér hana.
Stundum verður maður bara að versla.
En ég held að þær hafi haft það ágætt hérna. Við elduðum góðan mat handa þeim og ég held að þær hafi skemmt sér ágætlega.
Við prufuðum meira að segja dýnuna ykkar Hlynur og Arna og hún er bara allt í lagi. En ég hefði nú ekki nennt að sofa á henni mikið lengur. ;) En takk fyrir lánið!

Bænum ykkar hefur verið svarað!

2006-11-14T12:34:00.000-08:00

Við komum fyrr heim til Íslands um jólin! ;) Við munum stíga á fagra landið Ísland að kvöldi, eða í kring um miðnætti þann 18. desember. Þannig að við höfum nægan tíma til að hitta ykkur kæru vinir og fjölskylda!!! Og það sem meira er þá verðum við á landinu þangað til 12. janúar. Ef ykkur langar til að hitta okkur á meðan að á dvöl okkar stendur tökum við við tímabókunum á e-mailum okkar: Sigrún - sha1@hi.is og Oddgeir - oddgeir@hi.is

Gestir, Kaupmannahöfn og Fields - stærsta verslunarmiðstöð Skandinavíu

2006-11-12T04:08:00.000-08:00

Við hittum Völu, Raffi og Bjarna (bróðir hennar Völu) í gær. Bjarni bjó hérna í Svíþjóð, ekkert langt í burtu frá okkur, en er að fara heim í dag, þannig að Vala og Raffi voru að heimsækja hann á meðan þau höfðu tækifæri til þess, og ákváðu að heimsækja okkur í leiðinni. Þau buðu okkur með sér til Kaupmannahafnar. Við skelltum okkur með þeim. Þetta var í fyrsta skipti sem við höfum farið á bíl á yfir Öresund-brúnna. Eyddum svo þeim degi í Fields verslunarmiðstöðinni. Við höfðum heyrt að Fields væri stærsta verslunarmiðstöð Evrópu. Þannig að að sjálfsögðu langaði okkur að sjá hana. Jafnvel þó svo að mér þótti nú skrítið að Danmörk af öllum löndum í Evrópu gæti verið með stærstu verslunarmiðstöðina. Bílastæðið var risastórt, og miðstöðin sjálf var þónokkuð stór. Hún virtist ekki vera svo stór, en allar búðirnar vöru mjög stórar, þ.e. náðu mjög langt inn. Þannig að hún var stærri en hún virtist vera þegar maður gekk um ganginn.
Ég ákvað samt að googla - the biggest mall in Europe, og athuga hvað ég myndi finna. Það sem ég fann var: MetroCentre, one of Europe's largest shopping and leisure centres, í Bretlandi, sem annarsstaðar var sögð vera sú stærsta í Evrópu; Cevahir Shopping Mall in Istanbul, the biggest shopping mall in Europe and the second biggest one in the world; Russia's InCity in Europe's largest underground mall í Moskvu. Það sem kemur oftast upp er Cevahir og á eftir því MetroCenter. En aftur á móti fann ég út að Fields er stærsta verslunarmiðstöð Skandinavíu. En það er mjög merkilegt. Ég var nú alveg næstum því farin að halda að það væri rétt að Fields væri stærsta í Evrópu, þegar við vorum á bílastæðinu að minnsta kosti. En þá vitum við það, stærsta verslunarmiðstöð Skandinavíu, hvorki meira né minna, og merkilegt að það sé í Danmörku, en ekki í Noregi eða í Svíþjóð. Danir eru svalir! ;)
En annars var þetta ágætis verslunarferð ég keypti mér peysu sem er að sjálfsögðu mjög flott, og svo keypti ég mér smá föndurdót í Panduro hobby, þeir eru með rosalega flottar perlur og svoleiðis dót til að búa til skartgripi, og svo keyptum við Oddgeir okkur (aðallega Oddgeir) slatta af bjór og tvær beljur af rauðvíni í Bilka. Það er svo miklu ódýrara í Danmörku en í Svíþjóð. He he he ;)
En svo að sjálfsögðu buðum við þeim í mat til okkar. Það verða nú fleiri Íslendingar að bætast í hópinn að fá að berja almennilega augum okkar fallegu íbúð, og bragða á okkar dýrindis matseld!
En þetta var góður dagur og ágætismatur. Takk fyrir daginn Vala, Raffi og Bjarni og góða ferð heim í kvöld!

Nýjar myndir!

2006-11-07T03:10:00.000-08:00

Hæ hæ,
Við erum búin að setja HELLING af nýjum myndum inn á bloggið okkar! Kíkið bara! Það eru helling af myndum frá Stokkhómi og svo eitthvað af myndum sem við tókum hérna heima í Lundi. Skemmtið ykkur við að skoða þær. Það er linkur inn á myndaalbúmið okkar til hægri á síðunni undir liknum - það sendur myndirnar okkar ;)

Stokkhólmur

2006-11-04T02:38:00.000-08:00

En aðeins um Stokkhólm. Semsagt borgina sem við fórum til á síðustu helgi. Það var rosalega kallt! En samt ekki snjór, eins og var hérna í Lundi í gær og fyrradag, og örugglega í Stokkhómi líka. En það var samt kallt. Líklega samt ekki jafn kallt og á Íslandi. He he he... En ég ætti kannski ekki að hlæja því að þegar við komum hingað fyrir 2 árum held ég, þá var 17 stiga frost. Það verður nú varla svo kallt á Íslandi.
Hér er smá ferðasaga:
En við Oddgeir tókum lest á aðfaranótt föstudagsins til þess að komast til Stokkhólms. Lestin fór kl. 5:30 minnir mig. Þannig að við þurftum að vakna mjög snemma til þess að geta hjólað með allt dótið okkar niður í bæ. Við ákváðum að fara svona snemma, því að það var miklu ódýrara, en kannski ekki sniðugt, því að við sváfum lítið sem ekkert þá nótt. Lestin tók rúmlega 4 klst. Svo þegar við komum til Stokkhólms og vorum búin að finna farfulglaheimilið okkar, sem var gammall bátur, fórum við í Skansen, sem er einskonar húsdýragarður. Þar sáum við norðurlanda-dýr, t.d. uglu, björn, úlf, seli, vísund (vísundur var víst norðurlandadýr fyrir 5000 árum), villisvín, eitthvað skrítið stórt kattdýr og eitthvað fleira. Það var alveg ágætt, en þann dag var bara svo drullukallt og það mikið rok að það var frekar erfitt að hafa regnhlíf, þó að það væri heljarins-rigning.
Svo fórum við á Fridays að borða og fórum snemma að sofa. En við náttúrulega skoðuðum líka aðeins aðal-verslunargöturnar.
Á laugardeginum byrjuðum við á að kaupa skó handa mér af því að ég var að deyja í fótunum á því að labba í nýju flottu leðurstígvélunum mínum. En við höfðum keypt flotta Timberland skó handa Oddgeiri deginum áður, þannig að ég fékk líka svoleiðis. Svo fórum við í kúlubíó, í Naturhistoriska safninu. Bíóið heitir Cosmonova og er rosa flott. Við sáum 3-víddar barna mynd ;) og svo skoðuðum við náttúrulega safnið aðeins, en það er mjög flott.
Svo kom að því að gera það sem við komum til Stokkhólms til að gera - Hitta Ingu og Ragga! Þau hringdu þegar við vorum á safninu, þannig að við drifum okkur niður í bæ til að hitta þau. Að sjálfsögðu röltum við verslunargöturnar með þeim og hjálpuðum þeim að versla, eða hjálpuðum kannski mest lítið, en vorum allavega upp á punt og til skemmtunar!
Um kvöldið átum við eins og um morgunin, McDonalds. Já, hádegismatur og kvöldmatur þar, mjög hollt.
Daginn eftir, á sunnudeginum, fórum við með Ingu og Ragga að skoða höllina og sjá verðina hjá höllini marsera og svoleiðis, og alla túristana troðast. Það var mjög mikil skemmtun.
Svo höfðum við það gott þann daginn. Röltum um gamla bæinn og svoleiðis. Lögðum okkur svo, af því að við Oddgeir höfðum lent í þeirri hræðilegu lífsreynslu að búa með einhverjum í herbergi sem hraut svo hátt að við gátum ekki sofið, og þurftum þessvegna að fara fyrr á fætur en við höfðum vonað. Þetta fyrr á fætur var svona tími þar sem Gunni væri ekki einusinni byrjaður að hugsa um að hann ætti kannski að fara koma sér heim, ég leyfi ykkur að giska hvað klukkan var þegar við fórum útúr herberginu og á röltið :)
En um kvöldið höfðum við það rosalega gott. Við borðuðum á rosalega góðum ítölskum veitingastað í gamla bænum, og fórum svo á hótelið þeirra Ingu og Ragga og héldum áfram að hafa það gott. Það var æði að hitta ykkur!!
Á mánudeginum fórum við Oddgeir svo aftur heim til Lund um kvöldið, en fyst skoðuðum við mannlífið í Stokkhólmi aðeins betur og keyptum okkur hátalara fyrir tölvuna og poppvél. Maður verður nú að geta almennilega horft á video!!!! og svo ekki sé talað um að borða poppkorn!
Og við vorum merkilega fegin að komast heim til Lunds og ná upp svefninum sem við höfðum misst, þó svo að ferðin hafi verið mjög skemmtileg í heildina! ;)

En að öðru og merkilegri hlut!
Í dag gerðist sá merkilegi hlutur að Oggi fór með neðri mörk þyngdar sinnar niður fyrir 3 stafa heiltölu! Já hér er allt að gerast! Ef við förum útí einhverja útreikninga þá tel ég að þessi árangur hafi kostað 250 km á hjólinu í ræktinni og c.a. 15 km hækkun á stigavélinni í ræktinni!
Eins og áður er tekið við sms baráttukveðjum og hamingjuóskum í síma: +46 762 333 217.

Sigga og Oggi

Nýr póstur! Um próf.

2006-11-04T02:24:00.000-08:00

Afsakið hversu lítið hefur verið skrifað hér undanfarið. Ég var að taka próf í gær og reyndi að læra eins mikið og ég gat eftir að við komum heim frá Stokkhólmi, þ.e. þriðjud. til föstudags, og tók svo prófið í gær. Steingleimdi blogginu á meðan. En ég held að það hafi gengið ágætlega. Ég ætti allavega að ná. Prófið var lokapróf í Cognition, þ.e. hugsun og svoleiðis.
Ég lenti samt í smá veseni. Ég mætti aðeins of seint í prófið. Það var svo kallt um morguninn að lásinn á hjólinu var frosinn og við Oddgeir þurftum að spreyja í hann og reyna að losa hann. Svo þegar ég kom í þetta hús þar sem prófið var fann ég ekki stofuna. Ég hafði aldrei komið í þetta hús áður og það var ekkert merkt þarna inni. Þannig að ég kom svona sirka 7 mín. of seint. Svo bað ég um prófið mitt og fékk það á sænsku, en ég hafði beðið um að fá að taka það á ensku. Þannig að ég kallaði aftur í konuna. Hún fór til baka og náði í eitthvað próf, sem einhverjir aðrir voru að taka þarna inni sem var í persónuleikasálfræði og var á ensku. En þá þurfti ég náttúrulega að fara til baka með það próf, af því að það var ekki rétta prófið ;) Þá komst ég að því að annað hvort hefur kennarinn gleymt mér, og gleymt að gera prófið á ensku fyrir mig. Eða þá að hann hefur ætlast til þess að ég myndi lesa spurningarnar á sænsku og leysa prófið á ensku. Því miður er ég ekki alveg nógu góð í sænsku og var náttúrulega ekki með orðabók, þar sem ég bjóst ekki við að vera að taka prófið svona, skildi ég ekki fullkomlega spurningarnar. Ég held að ég hafi skilið þær nógu vel, en það voru alltaf einhver orð sem ég skildi ekki, þannig að kannski hef ég verið að svara einhverju vitlausu. Þannig fór það!!! ;)
En eins og ég segi þá held ég að þetta hafi reddast.
En það var soldið skrítið að taka próf hérna. Prófin eru 5 klst. löng. En maður má mæta klst. eða einni og hálfri klst. of seint, ég man ekki alveg. Þannig að það var stöðugur gangur um stofuna á meðan maður var í prófinu. Þar sem ég mætti of seint þurfti ég líka að sitja við fatahengið, sem var kannski ekki besti staðurinn. Svo er maður í svona risa-stofu, næstum eins og að taka próf í KR-heimilinu eins og hefur stundum verið í Háskólanum núna út af framkvæmdunum.
En prófin eru samt ekki það löng að maður þurfi að vera inni í 5 klst. Prófið byrjaði kl. 8:15 og ég fór út kl. 10:30. Ég var semsagt bara ca. 2 klst. Ok. það hljómar illa! En það var alveg 1/3 farin út á undan mér, eða amk. 1/4 ;) Próftíminn virðist vera þannig að maður eigi alltaf að geta klárað prófið alveg, sama hvað, og meira en það. Mjög skrítið miðað við prófafyrirkomulagið í Háskóla Íslands, og ég held prófafyrirkomulag yfir höfðu á Íslandi.
En nóg um próf... allavega þarf ég ekki að taka annað fyrir jól. Bara lokaverkefni sem ég á að skila í janúar í næsta kúrsi!!!

Höfuðborgin

2006-10-25T13:31:00.000-07:00

Kæru lesendur!

Mér hryggir rosalega að segja ykkur að ekki verður bloggað á þessa síðu á komandi helgi! En örvæntið ekki það ætti að vera hægt að fá hrygg í næstu Nóatúns verslun.
Ástæða þessa að ekki verður bloggað um næstu helgi er að ég og Sigga höfum ákveðið að leita eftir stofu 7913 í höfuðborg Ríkisstjórnarhneykslislandi. En mér hefur verið sagt að rekja meigi hneykslismál stjórnarinnar til einhvers sálms sem ku hafa verið kyrjaður í umræddri stofu. Hefur nú áhugi minn vaknað á því hvort ekki sé hægt að nýta þennan sálm til að velta ríkisstjórnum sem ekki virða rétta náungans úr sessi.

Á ferðalagi þessu mun ég eftir bestu getu reyna að mynda eins mikið og myrkrið leyfir í umræddri borg og notfæra mér svo nýfundna reynslu mín og kyrja einhverjar myndir inn á myndasíðuna sem tilheyra á þessarri síðu.

En að öðru og mikilvægara málefni!
Eins og fram hefur komið í pósti frá Siggu þá stendur yfir mikið heilsuátak hjá undirrituðum, en ætlunin er að koma sér í gott form fyrir jólasteikurnar sem fjölskyldur okkar ætla bjóða okkur í, (Inga systir ég er ennþá að bíða eftir matarboðinu þann 26 des!)
Mun ég koma með að tilkynna ykkur um árangursáfanga mína um leið og þeir sjást eða mælast!
Tekið verður við baráttukveðjum, hvenær sem er, og hamingjuóskum, þegar við á, í síma +46 762 333 217 en það ku vera mitt sænska gsm símanúmer.

Og að lokum vill ég spyrja ykkur tveggja spurninga:
1. Hvað heitir höfuðborgin?
2. Hvaða kallast Ríkisstjórnarhneykslisland í daglegu tali, (að undanskyldum síðastliðnum mánuði)?

Kveðja,Oggi

Matarboð

2006-10-23T13:15:00.000-07:00

Við vorum boðin í mat í gær. Það var par frá Austurríki sem bauð okkur. Fyrst ætla ég að segja ykkur frá því, svo það komi örugglega fram, að það var mjög gaman. Þau eru mjög skemmtileg. En þau ákváðu að elda eitthvað austurríkst handa okkur og við fengum vínarsnitsel. Þetta voru djúpsteiktustu vínarsnitsel sem ég hef nokkru sinni séð. Eldamennskan gekk þannig fyrir sig að heilt smjörstykki/smjörlíkisstykki eða eitthvað svoleiðis var brætt á pönnunni og svo voru vínarsnitselin að sjálfstögðu í deigi steikt í því. Þar sem mér líkar ekki djúpsteiktur matur var þetta ekkert voðalega spes að mínu mati. En ég borðaði það samt til að vera kurteis. Ég er svo dugleg! Oddgeiri fannst þetta samt gott. Hann er líka duglegri en ég. Hann er meira að segja í ræktinni núna en ekki ég. Ég er bara að læra, eða úps..... Ég ætti kannski að halda áfram að gera það....

Heimsókn nr. 2

2006-10-23T13:08:00.000-07:00

Á laugardagskvöldið skelltum við Oddgeir okkur í heimsókn nr. 2 á slysó/læknavaktina hérna. Svaka stuð. Í fyrra skiptið sem við fórum eyddum við föstudagskvöldi í það, ca. 3 klst. bið. Þá datt Oddgeir af hjólinu sínu. Eiginlega flaug frekar, beint yfir framhjólið og stýrið og á götuna. Þannig að við skelltum okkur á slysó að láta tékka á þessu. Hann brákaði rifbein, hrakfallabálkurinn. En nú er það allt batnað.
En okkur fannst þetta svo skemmtilegt, að eyða svona helgar-kvöldi á slysó, að ég fékk blöðrubólgu á laugardaginn. Og viti menn - við eyddum laugardagskvöldinu á slysó. Þeir eru nefninlega ekki með læknavakt eins og í Reykjavík. Heldur tekur slysó við öllum. Þannig að ég lenti náttúrulega í engum forgangi og þurfti að bíða í rúmlega 3 klst.
Skemmtilegt að eyða helgunum sínum svona. Af hverju gerast svona hlutir ekki á virkum dögum á milli kl. 8 og 10 á morgnanna, þegar heilsugæslan er með opna tíma?

Íkornar

2006-10-21T04:41:00.000-07:00

Ég man eftir einni setningu sem ég var ekki sammála í Sex and the city þætti. Carry sagði: ,,Squirrels are only rats with cuter outfits". Þessu get ég ekki alveg verið sammála. Ég neita því ekki að hægt er að líta á íkorna sem meindýr. En þeir eru bara svo miklar dúllur.
Ég sá minn fyrsta íkorna, síðan ég kom hingað, í gær. Hann var geðveikt sætur. Greyið litla var að hlaupa yfir umferðargötuna. Sem betur fer varð hann ekki fyrir bíl í þetta skiptið.
Hugsið ykkur rottu að hlaupa yfir götu, ojjjj... Maður myndi ekki vera fegin ef hún myndi ekki lenda fyrir bíl, ekki það að ég myndi vera fegin ef hún myndi lenda fyrir honum, en mér væri frekar sama.
Svo eru mýs. Þær eru nú litlar og svolítið sætar. Ég get nú ekki neitað því. En þær minna bara svo hrikalega mikið á rottur, þannig að einhverra hluta vegna verða þær ekki eins sætar fyrir vikið.
Ég bara sé ekkert mikið sameiginlegt með rottum og íkornum. Lengi lifi íkornar!!!

Sjónvarp

2006-10-19T13:35:00.000-07:00

Mig langar líka að nota tækifærið á meðan ég er að mótmæla, þrátt fyrir að það sé ekki 1. maí, að mótmæla því að ég fái ekki að horfa á sjónvarpið í íbúðinni okkar hér í Svíalandi. Mér fynnst það klárlega vera mín ákvörðun hvort að ég horfi of mikið á sjónvarpið þannig að einkunnirnar mínar líði fyrir það. Ég tek það ekki í mál að einhverjir svíar ákveði það fyrir mig!!!

Gyllt gyllt gyllt

2006-10-19T12:23:00.000-07:00

Ég keypti mér geðveikt gylltan bol í dag. Ég sá nefninlega þegar ég fór með nokkrum aðilum (eða aðiljum) á eitt nationið í gærkvöldi, að ég á enginn föt til að vera í þegar farið er eitthvað svona að dansa og svoleiðis. Ég var eina á gólfinu sem skein af að væri lögfræðinemi, allavega á Íslandi. Næstum alveg svartklædd og svona. Þannig að ég ákvað að skella mér í Gina Tricot eftir skóla og keypti mér gylltan bol með enn gylltari hlýrum. Já, ykkur finnst það kannski ekki vera alveg ég, en hann kemur bara vel út. þið fáið kannski að sjá hann seinna.
En það var dálítið skondið að fara út í gærkvöldi á eiginlega bar-klúbb, á miðvikudegi. Ekki alveg það sem maður er vanur. Reyndar fynnst mér eiginlega verða að koma fram að við vorum ekki drukkin. Ég fékk bara 2 cidera sem voru bara 33 cl. og einungis 3,5 % alkóhól (veit ekki alveg hvort þið vilduð vita þetta, en mér fannst ég bara verða að verja mannorð mitt, þar sem það var jú miðvikudagur í gær).
En það var dálítið sjúkt við þennan stað sem við fórum á í gær. Ég var að dansa í sakleysi mínu þegar mér varð vart við að ég þurfti að fara á salernið. Þannig að ég fór af dansgólfinu og fann salerni. Um leið og ég girti niður um mig buxurnar og settist á klósettsetuna, áttaði ég mig á því, mér til mikillar undurnar, og ama, að þarna sat önnur ung kona, beint á móti mér, einnig með beran bossan á klósettsetunni. Ég horfði að sjálfsögðu strax undan reyndi að standa strax upp og hysja upp um mig buxurnar á meðan ég sneri mér við, um leið og ég var búinn. En það var ekki hægðarleikur þar sem ég var í ansi þröngum buxum.
Semsagt það sem ég vildi sagt hafa var að á milli salerna var veggur úr gleri. Reyndar þykku gleiri, þannig að myndin sem maður sá í gegn var aðeins brengluð. En trúið mér þegar ég segi, að myndin var ekki nægilega brengluð. Já, þetta brýtur augljóslega gegn mínu einkalífi. Ég kæri mig sko ekkert um það að aðrir geti horft á mig á klósettinu. Ég mótmæli!
Munið þið eftir speglinum á Astro (ég held allavega að það hafi ennþá heitið það þá) þegar það sást frá karlaklósettinu yfir í kvennaklósettið. Þó svo að það sé augljóslega ekki rétt að karlmennirnir sjái konurnar mála sig og laga brjóstahöldin, og sérstaklega ekki án þeirra vitundar, þá fynnst mér salernið á þessum óforskammaða stað sem ég var á í gær öllu verra!!!

Hjólaviðgerðir

2006-10-15T03:20:00.000-07:00

Það er ekki gott að vera námsmaður í landi þar sem hjól eru dýr. Þá neyðist maður nefninlega til þess að kaupa notuð hjól. Við reyndar fengum góðan díl á hjólunum okkar. En góður díll hérna, á hjólum, þýðir bara að það séu hjól sem eru ekki ryðguð í sundur, komast áfram án mikilla vandkvæða á deginum sem þau eru keypt á, og ef maður er heppin eru þau með nokkrum gírum sem virka. Sem þýðir að Oddgeir er búin að fá mikla reynslu í hjólaviðgerðum. Jibbí!!!! (eða eitthvað svoleiðis)

Film-café

2006-10-09T02:52:00.000-07:00

Og ef þið viljið vita meira um það hvað ég gerði í gær, þá fór ég á film-café. Það er eitt nation-ið hérna, þ.e. einskonar nemendafélög, sydskånska nation (reyndar ekki mitt nation), sem sýnir mynd og selur kaffi, te, kökur og brauð með því á sunnudagskvöldum. Mjög næs. Ég skellti mér með Kati og 2 finnum á meðan Oddgeir var að læra, he he he... Hann er að gera eitthvað heimaverkefni og lenti í hóp með einhverjum sem virðist skilja minna en hann (allir að taka smá stund og vorkenna Oddgeiri). Ekki allir jafn heppnir og ég að vera að læra sálfræði hér. En ég hafði það gaman. Við sáum Kiss kiss bang bang. Hún er alveg nokkuð góð. Soldið flókin, og þar sem gæðin voru ekki upp á neitt svo marga fiska (kannski 3 af 5), myndin fraus sko nokkrum sinnum, (okey, kannski 2 af 5 fiskum) þá skildi ég ekki alveg plottið. En ég mæli samt með henni. En ég mæli aftur á móti ekki með lemon-squares, sem var kakan sem ég fékk, hún var ekkert svo góð.

Aerobic

2006-10-09T02:34:00.002-07:00

Hafið þið einhverntíman prófað Aerobic? Það er nú alveg brandari. Ég (Sigrún, ef ég þarf að segja ykkur það) ákvað að prófa það í fyrsta skipti í gær. En það byrjaði ekki vel. Það eru fleiri en Oddgeir sem villast á stofum, því að ég fór í vitlausan sal í gær. Það voru eitthvað ískyggilega fáir í þessum sal, og upphitunin var ískyggilega létt. Það var líka eitthvað skrítið að karlinn sem var að stjórna var mjög spes, mjög stór og með stóra bumbu. Svo fór hann að gera einhver spörk og fór að boxa með höndunum. Mér fór ekki að lítast á blikuna, og leit í kringum mig og sá að þeir sem voru í salnum voru flestir með einhverja bláa litla búða með sér og nokkrir box hanska. Æ, æ, þá var ég fljót að hlaupa út...
...og stakk mér inn í næsta sal, hann var fullur af fólki (en það var réttur salur). Mest náttúrulega af stelpum, en líka nokkrir strákar. En allir virtust hafa verið þarna oft áður, því að allir kunnu sporin, nema ég. Ég hoppaði og sneri mér alltaf svona 3 sek. á eftir öllum öðrum, og þegar allir fóru til vinstri fór ég stundum óvart til hægri. Já, það er greinilegt að á meðan ég hef verið að liggja upp í sófa, borða nammi og horfa á video í Lundi hafa aðrir verið að fara í aerobic tíma! ;) Nei, ég er nú að ýkja því að ég er ekki bara búin að liggja uppi í sófa, heldur er ég nú búin að mæta nokkrum sinnum í yoga og að lyfta, þ.e. þetta rólega. Ég er kannski bara ekki alveg þessi stuð-aerobic týpa. Ég er samt að spá í að prófa að mæta í latin-aerobic í kvöld, það á víst að vera meiri dans, en einhver hopp og stuð-pop spor ;) Ég læt ykkur vita hvernig það gengur, hvort sem þið hafið áhuga á því að vita það eða ekki. He he he...

Nú er illt í efni

2006-10-09T02:34:00.001-07:00

Já, nú er illt í efni. Faðir minn (Sigrúnar auðvitað) er hættur að vilja tala við mig. Ég var að tala við hann í símann í gær og hann vildi ekkert hlusta á það sem ég var að segja honum. Hann bað bara um að fá að tala við Oddgeir! Er Oddgeir sonur hans? Nei. Hann var víst að kaupa sér nýjan mótordreka, en hann vildi ekkert segja mér það. Það er ekkert gaman. Betra að segja Oddgeiri það, þó svo að ég hafi líka gaman af því að heyra um svif-dótið hans pabba. Já, ég er alveg hreint móðguð... ;)

Vesen ;)

2006-10-07T16:02:00.000-07:00

Við lentum í veseni í dag, eða tæknilega séð í gær, allavega samkvæmt okkar tíma. Þannig var að við áttum þvottatíma í þvottahúsinu, sem er ávallt hátíð, þar sem erfitt getur reynst að fá svoleiðis tíma. Við vorum meira að segja svo heppin að við fengum nokkrar klukkustundir, eða extra langan tíma, við skiptum nefninlega við vinkonu okkar sem þurfti einmitt að vinna þegar hún átti þvottatíma. Klukkan hálf 2 í dag, þegar hálftími var liðinn af þvottatímanum okkar, þar sem við áttum svo langan tíma að við vorum ekkert að flýta okkur, fórum við í þvottahúsið og settum tvær vélar í gang. Þegar 50 mín. voru liðnar og vélarnar okkar ættu að vera búnar röltum við svo aftur að þvottahúsinu. En okkur til mikilla ama var þá búið að taka fötin okkar úr vélinni og henda þeim í hrúgu á gólfið fyrir utan þvottahúsdyrnar, og læsa inn í þvottahúsið. Við fáum nefninlega svona skráargata-læsingu, sem við getum sett í skráargatið og læst svo enginn annar komist í þvottahúsið á meðan fötin okkar eru þar. En við höfðum ekki sett okkar í þar sem við skiptum við vinkonu okkar um tíma eins og fyrr segir.
Að sjálfsögðu athuguðum við aftur hvort við hefðum ekki örugglega rétt fyrir okkur og þvottatíminn okkar væri nú á þessum tíma, sem og var. Þannig að við fórum og hringdum bjöllunni hjá þessu fólki sem hafði hent fötunum okkar í burtu. En enginn svaraði. Við höfðum ákveðið að fara í ræktina, ég (Sigrún) ætlaði í danstíma sem ég var búin að bíða lengi eftir og er bara á laugardögum, en ekkert varð af þeim plönum þar sem við þurftum að sitja um fólkið í ca. klukkutíma. Þegar þau loksins komu voru þau afskaplega miður sín. Þau báðust fyrirgefningar aftur og aftur og sögðust hafa haldið að það væri 6. í dag en ekki 7. eins og var!!! En Halló! Hver hendir fötum sem aðrir eiga út úr þvottahúsinu í hrúgu þar sem allir geta tekið þau? Og hvaða heilvita maður fattar ekki að ef það er allt upp pantað a.m.k. rúmlega viku fram í tímann en ekkert áður að sá dagur sem ekkert er á, getur hann ekki verið dagurinn í dag?
Eftir þessar hrakningar varð ekki mikið annað af deginum en að þvo AFTUR fötin okkar sem hafði verið hent í burtu, og allt hitt sem við áttum eftir að þvo. Þannig að ég missti af danstímanum sem ég hafði beðið eftir alla vikuna og við komumst ekki einu sinni í ræktina þar sem hún lokar svo snemma á laugardögum að það var búið að loka þegar við loksins vorum búin að þvo.
Það þarf nú varla að segja frá því að þegar þau, eyðileggingarþvottafólkið, buðu okkur að bæta okkur þetta upp með því að bjóða okkur yfir til sín í drykki, vorum við fljót að segja: nei, takk! Við umgöngumst ekki þvottaóþrjóta, he he he ;)
Nú erum við að gera upp við okkur hvort að við eigum að kvarta yfir þeim, eða láta eins og það sé allt í lagi að henda fötunum manns á gólfið fyrir utan, af því að maður heldur að það sé annar dagur, og er ekki nógu gáfaður til þess að kíkja á dagatalið og athuga hvort að maður hafi rétt fyrir sér. Að sjálfsögðu voru þau með góða afstökun eins og allir sem svona hlutir koma fyrir og deildu því með okkur að í þeirra heimabæ væri alltaf verið að stela þvottatímunum þeirra þannig að þau virtust vera vön að henda annarra manna þvotti á gólfið.
Jæja gott fólk, með hverju mælið þið? Á að kvarta undan þeim, eða fara yfir til þeirra í kaffi eða eitthvað sterkara?

Lab

2006-10-06T03:25:00.000-07:00

Í dag var ég í lab tíma, ávalt mjög skemmtilegt að vera í labi. En í dag viltist ég í annað lab en ég átti að vera í. Það var alveg ágætt þangað til að ég las upp heitið á þeim tíma, en það var: Darklab! Jújú allt í lagi með það svosem..þangað til.. að ég leit í kringum mig og sá að það voru eingöngu svarthærðar stelpur með oddmjóa hata í þessum lab tíma! Á þessum tímapunkti hugsaði ég: "er ég nokkuð að villast á stofum?" ég náði varla að hugsa spurningamerkið þegar inn gekk hlæjandi kona. Svo heppilega vildi til að ég var að taka minnispunkta í þann mund sem konan gekk inn og náði ég því einnig hlátrinum. Mæli ég með því að þið hlustið á hláturinn, því eftir þetta þá varð mín stutta reynsla í þessum lab tíma ívið furðulegri.
En stuttu eftir að konan kom inn fóru allar stelpunar að kyrja eitthvað óskiljanlegt muldur, ég reyndi að taka þátt en um leið og ég byrjaði að muldra fóru ljósin að blikka og hurðir að skellast. Ég ákvað því að sitja hjá í þetta skiptið og reyna finna eitthvað í kennslubókinni sem gæti útskýrt hvernig þetta alltsaman gæti tengst stafrænum samskiptaaðferðum, eftir að hafa blaðað í gegnum bókinna og ekki fundið neitt ákvað ég að athuga hvort ég væri örugglega í réttri stofu. Ég gekk útúr stofunni og sá þá að ég var í stofu 7913 en ekki 4119 eins og ég átti að vera í, í þeirri andrá sem ég áttaði mig á þessu sá ég hvítan blossa koma úr stofunni, það næsta sem ég man var að ég var í stofu 4119 og kennarinn var að spyrja mig hverja villulíkurnar eru að ef sent er merki m=m1 og móttakarinn skilar merkinu m0!

Já ég get bara sagt eftirfarandi um þessa lífsreynslu: Svíar, þeir eru klikkaðir!

Á mánudaginn ætla ég að reyna finna þessa stofu aftur og reyna komast að því hvaða kúrs þetta var, gæti komið að góðum notum í framtíðinni að kunna þetta muldur sem þær fóru með!

Þrumur og eldingar

2006-10-01T06:17:00.000-07:00

Það virðst vera ansi oft þrumur og eldingar á þessum slóðum, og Oddgeir er að fíla það! Hann hleypur annað hvort út í glugga þegar það byrjar, eða alveg út og stendur þar til að reyna að sjá sem mest ;) Fyrir nokkrum dögum byrjaði þrumuveður þegar við vorum á leiðinni heim á hjólunum okkar. Það kom bara allt í einu og það var mjög nálægt. Ég, Sigrún, varð ansi hrædd þegar það kom elding, teiknimyndaelding (þ.e. maður sá eins og í teiknimyndunum) og ég náði ekki að telja upp á einum þangað til þruman kom, og hún var hávær. Eldingin virtist hafa komið í blokkina fyrir framan okkur eða allavega rétt hjá henni. Ég hjólaði mjög hratt heim, næstum því kjökrandi ;)
Svo í gærkvöldi kom aftur mikið þrumuveður. Við vorum á leiðinni út í búð, en hættum við í bili. það var náttúrulega brjáluð rigning og mjög háværar þrumur. Oddgeir stóð úti í öruggle klukkutíma að skoða eldingarnar. Ég stóð úti í svona 15-20 mín. Bara til að telja hvort eldingarnar væru nokkuð nálægt. Sem betur fer voru þær a.m.k. 2-3 km. í burtu þegar þær voru næst okkur. Svo fór ég inn að horfa á Smallville, eins og maður á að gera þegar það er brjáluð rigning og þrumuveður, þ.e. horfa á video, en Oddgeir stóð úti. he he he... Hann er orðinn þrumu-óður....

Í dag....

2006-09-29T12:03:00.000-07:00

...fórum ég (Sigrún, ekki eins og Oddgeir sé eitthvað að skrifa á þessa síðu) í verslunarmiðstöðsem ber nafnið Center Syd.
Hún er í Löddeköpinge sem virðist vera eitthvað krummaskuð í áttinaað Gautaborg frá Lundi. Það gekk ekki einu sinni lest þangað, við þurftum að taka einhvern ömurlegan strætó! ;) Það er sko búið að vera að auglýsa þessa verslunarmiðstöð, og ég hélt að hún væri eitthvað rosa flott, þannig að ég dró Oddgeir þangað. Svo var hún bara pínulítið stærri en verslunarmiðstöðin hér í Lundi, Nova Lund. Það eina var að þarna á sama stað voru fínar matvörubúðir og íþrótta-outlet markaður. En þar sem það var íþróttavöru-outlet þarna græddum við aðeins á ferðinni þar sem okkur vantaði einmitt íþróttaföt! ;) Annars erum við ekki búin að gera mikið annað í dag. Við sváfum út og höfðum það gott. Í gærkvöldi var partý hérna í commonroom-inu í litla ,,hverfinu" okkar. Það verður svolítið mikið um svoleiðis þegar margir skiptistúdentar eru saman komnir. Sérstaklega svona margir frakkar. Ég mæli ekki með að búa í návígi við frakka. Því miður ákváðum við að fara út í gær og hitta fólkið, en ég segi því miður vegna þess að þegar leið örlítið á kvöldið voru frakkarnir orðnir ansi drukknir og farnir að klifra uppá þak á einu litlu húsi hérna á lóðinni og klæða sig úr uppi á þaki, og héldu virkilega að við vildum sjá það! Nei takk, ég hef ekki mikinn áhuga á því að sá nokkra frakka bera sig!!! he he he... Meira síðar...

Hæ hæ

2006-09-27T06:36:00.000-07:00

Ég, Sigrún, er loksins búin að skila inn þessu lokaverkefni mínu, þannig að
vonandi er ég búin með þann kúrs ;) Oddgeir er líka farinn að hressast. Hann er búinn að vera með hálsbólgu og kvef. Ekki gaman af því, þegar það er búið að vera að mestu leyti í kring um 20 stiga hiti. En reyndar er loftið hérna mjög rakt. Gæti haft eitthvað með það að gera. Þegar við þvoum fötin okkar reynum við að setja sem mest í þurkarann. Það sem við setjum ekki í þurkarann er að minnsta kosti 3 - 4 daga að þorna, inni. Mjög skrítið!
En sólin er farin í bili! :-( Það var búið að vera skólskin í marga marga daga, en núna er aftur farið að rigna - og það verður sko rigning hérna. það er sko engin Íslands-rigning, heldur meira eins og Spánar-rigning, eða kannski Amason-rigning (eða núna er ég kannski aðeins að ýkja, en hún verður oft mjög mikil). Við skulum vona að það verði ekki svoleiðis lengi...
Heyrumst seinna.

2006-09-26T02:48:00.000-07:00

Þetta er mynd af Oddgeiri að borða fína, góða nautakjötið sem við elduðum okkur um daginn, í fína, góða eldhúsinu okkar. Nammimamm...

hej

2006-09-25T09:41:00.000-07:00

Við ætluðum bara rétt að láta ykkur vita að það er komin myndasíða þar sem þið getið skoðað myndirnar okkar. Reyndar eru ekki komnar margar myndir frá Svíþjóð ennþá, en þetta er allavega smá byrjun. Koma fleiri aðeins seinna! ;)

Góðan daginn!

2006-09-24T02:57:00.000-07:00

Þessi menningarnótt Lundar var aðeins öðruvísi en menningarnóttin heima.
Hérna gekk allt mest út á að hafa það rólegt og þægilegt - og borða. Það var matur allsstaðar.
Veitingastaðirnir með borðin úti og líka matsölur á torgunum. En flest allt virtist vera úti.
Svo voru náttúrulega einhverjar hljómsveitir.
Við sáum aðal lúðrasveit bæjarins með svaka show í AF building. Þetta er stuð-sveit. Allir klæddir í hvítt að ofan og rauðar hnébuxur. Svo er svaka stuð á þeim. Þau eru meira að segja með klappstírur sem dansa með pom-poms á meðan þau eru að spila ;) En við sáum líka stjörnur. Við vorum of sein að fá aðal-sýninguna í Planiterium. En við fengum bara betra - barnasýningu í uppblásnu kúlu tjaldi. Það var alveg dimmt inni í tjaldinu og svo var stjörnufræðingur með lampa sem sýndi allar stjörnurnar og sagði á smá barnamáli frá.
Ég ætla líka að segja ykkur frá einu - það er ógeðslega mikið af sniglum hérna þegar það rignir.
Það er ógeðslegt! Þeir eru geðveikt slímugir og stórir. Ojjj.. Sem betur fer er ekki búið að rigna mikið síðustu 2 vikurnar. En svo eru broddgeltir hérna. Oddgeir sá einn áður en að ég, Sigrún, kom. Svo sá ég einn um daginn. En hann var dauður - og kraminn við götuna. Æ, æ, aumingja hann... En svo þegar það kemur myrkur á nóttunni þá fer maður að sjá alla froskana.
Þeir eru flestir mjög litlir, en við sáum einn frekar stóran um daginn. Svo höfum við líka séð kanínu, en þær eru nú ekki mjög merkilegar. Annars er maður nú hættur að sjá þær í Öskjuhlíðinni heima ;)
Svo er rosalega mikið, og já, ég meina rosalega mikið, af geitungum hérna. Þeir eru margfalt fleiri
en á Íslandi. Sem betur fer, að því leitinu til, er farið að kólna aðeins hérna þannig að þeim er
aðeins farið að fækka. Fólkinu hérna er alveg sama um þá. Þeir setjast á þau og þau bara blása þeim í burtu eða ýta aðeins við þeim. Alveg merkilegt að vera ekki hræddur við geitunga!
En það eru líka ennþá stærri flugur hérna, einhverskonar drekaflugur eða eitthvað svoleiðis. Annars hef ég ekki hugmynd um hvað þetta heitir. Þær eru grænleitar og RISA stórar og langar.
Mjög flottar úr fjarlægð, en hræðilegt þegar þær koma of nálægt. En þær eru líka ekkert mjög vanalegar. En gaman að vera búin að fræða ykkur um dýraríkið hérna. Vonandi hafið þið haft gaman af. Ég ætla núna að fara að halda áfram að skrifa aðeins í ritgerðinni minni áður en
Oddgeir vaknar.
Bæ í bili.

hæ hæ gott fólk

2006-09-23T10:04:00.000-07:00

Arg, ég, Sigrún, var búin að skrifa einn góðan póst fyrir ykkur og það datt svo
allt út! En ég ætla að reyna að gera nýjan í staðinn.
Við Oddgeir erum búin að læra í allan dag, þrátt fyrir að það sé laugardagur. Þið gætuð meira að segja farið að halda að við séum dugleg! Fyrsta önnin af 4 er að klárast þannig að við þurfum að skila inn verkefnum. Oddgeir er búin að vera að gera hópverkefni (gruppövning) og ég er búin að vera að gera ritgerð (hemskrivning). Sem betur fer getum við unnið þetta á ensku, þar sem að sænskan er ekki alveg komin í nægilega gott stand til þess að hægt sé að skrifa ritgerðir og þessháttar án mikilla málfræði og orðavillna ;)
Í kvöld er kulturnatt í Lund (eða menningarnótt). Það er víst nóg um að vera. Allir niðri í miðbænum og svaka gaman. Hver veit nema við kíkjum þangað og reynum að finna eitthvað skemmtilegt að gera. Ég hef ekki hugmynd um hvort að þetta sé eitthvað svipað og heima í Reykjavík, en það er allavega heljarinnar dagskrá. Meira að segja hægt að fara í stjörnuskoðun!
Svo náttúrulega þetta venjulega, hljómsveitir og svoleiðis.
Í gærkvöldi borðuðum við kvöldmat með Kati vinkonu okkar. Hún kemur frá Austurríki og býr á sama svæði og við. Næstum því bara í næsta húsi. Það var rosa gaman hjá okkur fyrir utan það að ÉG þurfti að hlaupa í þvottahúsið alltaf af og til vegna þess að þetta var eini tíminn, eftir 2 vikna bið sem við gátum fengið þvottatíma. Stundum er alveg agalegt að fá þvottatíma hérna, þar er gjörsamlega allt orðið skítugt þegar maður getur loksins þvegið eitthvað, og þá er ekki einu sinni víst að maður fái nægan tíma til að þvo allt. Við fórum og töluðum við skólan út af þessu hvort að það væri ekki hægt að gera eitthvað. Hvort að við gætum t.d. fengið tvo þvottalykla til þess að panta þvottatíma, þar sem við erum nú tvö. En við fengum bara svarið: ,,life is not always fair" og þannig endaði það samtal! Ótrúlegt hvað margir hérna eru ósveigjanlegir. Meira en á Íslandi ;)
En jæja, við verðum að fara að gera eitthvað skemmtilegt núna. Það er komin tími til.
Meira síðar.

2006-09-16T13:58:00.000-07:00

Hej allihopa,
Við erum búin að vera rosa dugleg að læra í dag. Vi har vårit jätte dugtiga att plugga (við ábyrgjumst ekki að þetta hafi verið rétt). Við vorum svo heppin að fá heimsókn fyrir nokkrum dögum, Hlyn og Örnu, og að sjálfsögðu nenntum við ekki að læra mikið á meðan. Miklu skemmtilegra að skoða sig um og gera eitthvað skemmtilegt. Við fórum t.d. í tívolíið. Við fórum í nýja tækið himmel-eitthvað. En það var ekkert svo skemmtilegt. Að sjálfsögðu fórum við líka í turninn, hann er alltaf skemmtilegur. En mikið ógeðslega fer hann hátt!
Við erum bara búin að hafa það frekar rólegt núna um helgina, allavega í gær og í dag. Við leigðum okkur sænskar myndir í gær. Já, merkilegt nokk, þá bara skildum við heilann helling af þessari mynd sem við horfðum á í gær! Það er kannski eitthvað af þessu máli að síast inn. Gaman að segja ykkur frá því að það virðist vera standardinn hérna að leigja myndir í 7 daga, en ekki bara einn. Það er samt hægt að leigja í einn. En þegar við leigðum þessar 3 gömlu, sæsku myndir vorum við ekki einu sinni spurð hvað við vildum leigja þær lengi. Gamlar myndir eru víst bara leigðar í 7 daga. En kosta náttúrulega það sama og að leigja gamla mynd heima í einn dag, held ég allavega... 20 kr. sænskar (200 kr. ísl.). Já, það er alltaf gaman að spá í því hvað hlutirnir heima kosta. Yfirleitt verður maður mjög ánægður yfir því að vera hér.
En nú þurfum við að halda áfram að læra. Fleiri fréttir síðar.

Hej då.

Til hamingju!

2006-09-15T13:52:00.000-07:00

Til hamingju allir okkar kæru vinir! Við erum loksins komin með blogg þar sem
þið getið nú fylgst með ferðum okkar og gjörðum í Svíþjóð. En það veltur að
sjálfsögðu allt á því hversu dugleg við erum við að skrifa inn á þetta! Hehe..
Jæja, þetta er nú allt og sumt núna, meira næst.
Og nú hugsa allir, úfff... þetta byrjar ekki vel!
Kveðja frá Svíþjóð.